Aİ-dən HƏMAS üzvlərinə yeni sanksiyalar

İsrailin Baş naziri Benyamin Netanyahu ordusuna Qəzza zolağında nəzarət etdiyi ərazini genişləndirmək əmri verib.

O bu barədə jurnalistlərə açıqlamasında bildirib.

“Ordumuza Qəzza zolağında nəzarət etdiyi ərazini mərhələli şəkildə genişləndirərək 70 faizə çatdırmaq göstərişi verdim. İsrail Ordusu HƏMAS-ın gücünü zəiflədib. Biz onlara hər tərəfdən təzyiq göstəririk. Hazırda Qəzzanın 60 faizdən çox hissəsinə nəzarət edirik və əməliyyatları dayandırmaq fikrimiz yoxdur”, – deyə Baş nazir bildirib.

Bu arada, Avropa İttifaqı İordan çayının Qərb sahilinə köçürülənlərin ”ekstremist” fəaliyyətini dəstəkləyən şəxslərə və təşkilatlara qarşı yeni məhdudlaşdırıcı tədbirləri təsdiq edib.

Qeyd olunub ki, HƏMAS-ın siyasi bürosunun 10 üzvü də “qara siyahı”ya daxil edilib. Aİ-nin iddiasına görə, onlar qərar qəbulu prosesində mühüm rol oynayır və HƏMAS-ın zorakılıq əməllərini həyata keçirməsinə əhəmiyyətli təsir göstərirlər.

Bildirilib ki, tətbiq edilən tədbirlər Fələstin əhalisinin hüquqlarının pozulmasına cavab olaraq atılıb və aktivlərin bloklanmasını, resursların təqdim edilməsinə qadağanı və Aİ ölkələrinə girişin məhdudlaşdırılmasını nəzərdə tutur.