Ali təhsili olmayan prezident | Gürcüstanın yeni prezidenti kimdir?

Gürcüstanda prezident seçkiləri baş tutub. 300 seçicidən 224-nün səsini toplayaraq Mixeil Kavelaşvili ölkənin altıncı prezidenti olacaq.

İlk dəfədir ki, Gürcüstanda prezidenti əhali deyil, Seçici Kollegiyası seçib. Yeganə namizəd kimi keçmiş futbolçu Mixeil Kavelaşvili ölkənin Prezidenti adına layiq görülüb.

Hər kəsə maraqlı olan məqam isə budur, Gürcüstanın yeni Prezidenti kimdir?

O, hakim “Gürcü Arzusu”ndan rəsmən ayrılmış “Xalqın Gücü” Partiyasının üzvüdür. Onun namizədliyini hakim partiyanın fəxri sədri, milyarder Bidzina İvanişvili verib.

O, siyasətə gəlməmişdən əvvəl peşəkar futbolçu olub. 53 yaşlı M.Kavelaşvili 1995-ci ildə Vladiqafqazın “Spartak-Alaniya” klubunda çıxış edib və Rusiya çempionu olub. 1996-cı ildə “Mançester Siti”yə keçib. Bir il sonra İsveçrənin “Grasshoppers” klubuna icarəyə verilib və ölkə çempionluğunu qazanıb. Futbolçu karyerasında sonuncu klubu 2005-2006-cı illərdə çıxış etdiyi İsveçrənin “Bazel” klubu olub.

M.Kavelaşvilinin ali təhsili yoxdur. Məhz bu səbəbdən o, 2015-ci ildə Gürcüstan Futbol Federasiyasının prezidenti postuna namizədliyini irəli sürə bilməyib. Bundan sonra keçmiş futbolçu siyasətə qoşulub. 2015-cı ildə M.Kavelaşvili ilk dəfə “Gürcü Arzusu”ndan parlamentə seçilib.

2023-cü ilin yazında “Xalqın Gücü” “Xarici agentlər haqqında” qanunun təşəbbüskarı olub. Təşəbbüs geniş etirazlara səbəb olub və geri götürülüb. Bir il sonra isə qanun yeni adla qəbul edilib. Qanunun zərurətini müdafiə edən M.Kavelaşvili parlamentdəki müzakirələrdə ön sıralarda olub.

Məlumat üçün bildirək ki, M.Kavelaşvilinin andiçmə mərasimi dekabrın 29-da keçiriləcək.