Alimlər quraq torpaqların sahəsinin əsrin sonuna qədər genişlənəcəyini bildirirlər

XXI əsrin sonlarına doğru planetin quru hissəsinin 40 faizindən çoxunu quraq ərazilər əhatə edə bilər.

Bu barədə araşdırma xarici nəşrlərdən birində dərc edilib.

Bildirilir ki, quraq ərazilər buxarlanmanın yağıntıların miqdarını kəskin şəkildə üstələdiyi bölgələrdir. Buraya səhralar, yarımsəhralar və quru çöllər daxildir.

Belə yerlərdə həyat quraqlığa və torpaqların deqradasiyasına qarşı həssasdır. Bu zonaların genişlənməsi isə kənd təsərrüfatı sahəsinə və milyardlarla insanın su təminatına ciddi təhlükə yaradır.

Çin Meşə Təsərrüfatı Akademiyasının alimləri 1994-2023-cü illər üzrə iqlim göstəricilərini təhlil edərək 2071-2100-cü illər üçün proqnoz hazırlayıblar. Hazırda quraq torpaqlar qurunun təqribən 38,58 faizini təşkil edir.

Hesablamalara əsasən, əsrin sonunda bu göstərici 40,28 faizə qədər artacaq. Mütləq rəqəmlərlə ifadə etdikdə, bu, təxminən 2,37 milyon kvadratkilometr – Əlcəzair boyda bir ərazinin əlavə olunması deməkdir. Dəyişikliklər ən çox Avstraliyaya təsir göstərəcək və orada quraq zonaların böyüməsi daha qabarıq şəkildə müşahidə ediləcək.