Alimlərin bu tapıntısı sübut etdi ki... | Təbiətlə bağlı heyrətləndirən kəşf

01 aprel 2025 299 baxış

Təbiət sürprizlərlə doludur. Alimlərin Tanzaniyadakı son tapıntısı bu faktı bir daha təsdiqləyib.

Belə ki, Udzunqva dağlarının cəngəlliklərində aparılan tədqiqatlar zamanı beynəlxalq botaniklər qrupu elmə əvvəllər məlum olmayan ağac növü aşkar ediblər.

"Tessmannia princeps", latıncadan tərcümədə "ən görkəmli" adlandırılan nəhəng ağaclar alimləri öz ölçüləri və yaşı ilə heyrətləndirib.

Bu yaşıl nəhənglərin hündürlüyü 35-40 metrə, gövdəsinin diametri isə təxminən 2,7 metrə çatır. Belə bir ağacı əhatəyə almaq üçün ən azı 5-6 nəfər tələb olunur. Lakin əsl sensasiya odur ki, ağacın bəzi nümunələrinin yaşı 2-3 min ildir.

Alimlər iki kiçik populyasiyada kompakt şəkildə böyüyən cəmi 100-ə yaxın ağac aşkar edə biliblər.

Yavaş böyümə tempi və məhdud arealı bu ağacları hər hansı xarici təsirlərə qarşı son dərəcə həssas edir.

Alimlər onu nəsli kəsilmək təhlükəsi altında olan növlərin siyahısına daxil etməyi təklif edirlər.

#Tanzaniya