Alimlərin tapıntısı hər kəsi heyrətləndirdi | Maraqlı araşdırmanın nəticələri

Düz 135 min il öncə insanlar danışa bilirmiş. Onların hansı dilə yaxın ünsiyyət qurduqları məlum olmasa da, buna dair bəzi sübutlar var.

Belə ki, Massaçusets Texnologiya İnstitutunun amerikalı alimləri insanların dildən istifadə edərək ünsiyyət qurma qabiliyyətinin 135 min il əvvəl formalaşdığını deyirlər.

Komanda son 18 il ərzində dərc edilmiş 15 genetik araşdırmanı təhlil edib. Bu tədqiqatlara Y-xromosom, mitoxondrial DNT və bütün genom analizləri daxildir.

Nəticələr göstərib ki, insan populyasiyalarının ilk coğrafi ayrılması 135 min il əvvəl baş verib. Təxminən 100 min il əvvəl oxradan istifadə və dekorativ işarələrin yaradılması kimi simvolik fəaliyyətlər geniş yayılmağa başlayıb. Bu isə dilin aktiv istifadəsindən xəbər verə bilər.

Tədqiqatçılar dilin əvvəlcə idrak sistemi kimi inkişaf etdiyini, sonra isə tez bir zamanda kommunikativ sistemə çevrildiyini irəli sürürlər. Bu, simvolik təfəkkürün və müasir insan davranışının digər formalarının inkişafı üçün katalizator ola bilər.

Tədqiqat inandırıcı sübutlar təqdim etsə də, digər elm adamları dilin mənşəyi məsələsinin mürəkkəb olaraq qaldığını etiraf edirlər. Arxeoloji və genetik məlumatlar da daxil olmaqla əlavə tədqiqatlar dilin inkişafının zaman çərçivəsini və mexanizmlərini aydınlaşdırmağa kömək edəcək.