Almaniya və İsveç ölkə vətəndaşlarını İranı tərk etməyə çağırıb

Almaniya Xarici İşlər Nazirliyi ABŞ tərəfindən mümkün aviazərbə təhlükəsi ilə əlaqədar vətəndaşlarını İranı tərk etməyə çağırıb.

Bu barədə Almaniya XİN nümayəndəsi jurnalistlərə deyib.

“Məhdud olsa da, hələlik kommersiya reysləri, İranla qonşu ölkələrə hava əlaqəsi mövcuddur, quru yolu ilə də çıxış mümkündür”, – deyə o bildirib.

Alman diplomat vəziyyətin gərginləşməsi halında konsulluq yardımı göstərməyin praktiki olaraq mümkünsüzlüyünə diqqət çəkib.

İsveç hökuməti də öz növbəsində regionda vəziyyətin pisləşməsi və mümkün eskalasiya riski ilə bağlı vətəndaşlarına mümkün qədər tez İranı tərk etməyi tövsiyə edib. Bu barədə İsveç Xarici İşlər Nazirliyi məlumat yayıb.

Bəyanatda vurğulanır ki, münaqişənin kəskinləşməsi halında ölkədən çıxış imkanları məhdudlaşa bilər. Bu səbəbdən İsveç vətəndaşlarına səfəri təxirə salmamaq və ölkəni mümkün qədər tez tərk etmək tövsiyə olunur. İranda qalmağa qərar verən şəxslərə isə yüksək dərəcədə ehtiyatlı olmaq, təhlükəsizlik qaydalarına əməl etmək və rəsmi məlumatları diqqətlə izləmək məsləhət görülür.

Rəsmi Stokholmun bu çağırışı Vaşinqtonda Tehrana qarşı müxtəlif hərbi ssenarilərin nəzərdən keçirildiyi barədə yayılan məlumatlar fonunda səsləndirilib.

Qeyd edək ki, ABŞ Tehranı əlverişli nüvə sazişi şərtlərinə razı salmaq üçün İranın hərbi və hökumət obyektlərinə məhdud zərbə endirmək imkanını nəzərdən keçirir, bununla da genişmiqyaslı hücumdan qaçmağa çalışır.

Daha əvvəl bu məlumatı “Reuters” agentliyi mənbələrə istinadən yayıb. Onların məlumatına görə, belə bir zərbə bir neçə gün ərzində endirilə bilər. “CBS” telekompaniyasının iddiasına görə isə əməliyyat fevralın 21-də başlaya bilər.