Almaniyanın keçmiş kansleri Putinlə danışıqlara dair sənədləri təhvil verməkdən imtina etdi

Almaniya hökuməti Gerhard Şröderin kansler olduğu dövrə aid xidməti sənədlər barədə hesabat təqdim etməyəcək.

Məsələ hakim koalisiya tərəfindən Bundestaqın Büdcə Komitəsinin gündəliyindən çıxarılıb.

Qeyd olunur ki, iclasdan əvvəl komitənin Şröderin ofisindən xidməti sənədlərin harada saxlanılması barədə məlumat alması planlaşdırılıb.

Şröder 2025-ci ilin yayında ofisi bağlandıqdan sonra bu materialların Fridrix Ebert Fonduna verilməsi barədə göstəriş verib. Beləliklə, o, uzun illərdir Dövlət Arxivinin bu sənədlərin təhvil verilməsi ilə bağlı tələblərini yerinə yetirməyib.

Hələ 2022-ci ilin mayında Bundestaqın Büdcə Komitəsi Federal Kansler İdarəsindən Gerhard Şröderin keçmiş kansler kimi ofisində olan xidməti sənədlərin qorunmasının təmin edilməsini tələb etmişdi. Daha sonra kansleriya onun ofisinə rəsmi müraciət edərək 178 arxiv qovluğunun təhvil verilməsini istəyib. Amma bu tələb yerinə yetirilməyib.

Almaniya mediasının məlumatına görə, həmin qovluqlarda iclas protokolları, şəxsi yazışmalar, əlyazma qeydləri və görüşlərə dair sənədlər, o cümlədən Şröderin Rusiya Prezidenti Vladimir Putinlə apardığı danışıqların qısa xülasələri yer alır. Fridrix Ebert Fondunda bu sənədlər ictimaiyyət üçün qapalı qalır.

Qeyd edilir ki, Gerhard Şröder Vladimir Putinlə dostluq münasibətlərinə malikdir. Almaniyanın keçmiş kansleri xüsusi günlərdə Rusiya liderindən təbrik alan azsaylı keçmiş dövlət başçıları sırasındadır.