Almaniyanın müdafiə naziri istefa verdi

Almaniyanın müdafiə naziri Kristin Lambrext istefa verib. Kansler Olaf Şolts onun istefa ərizəsini qəbul edib.

Bu barədə Almaniya hökuməti məlumat yayıb. Lambrext son aylarda ölkə mediasında çox müzakirə edildiyini və bunun Almaniya Ordusunun ehtiyacları ilə bağlı müzakirələrə kölgə saldığını bildirib. “Bununla əlaqədar mən vəzifəmi tərk etmək qərarına gəldim”, - deyə nazir qeyd edib.

Nazirlikdən bildirilib ki, Lambrextin yerinə kimin keçəcəyi yanvarın 17-nə qədər açıqlanmamalıdır. “Frankfurt allgemeine zeitung” nəşri bu haqda hökumət dairələrindən öyrənib. Məsələ hazırda ölkədə aktual hesab olunur. Çünki Qərb ölkələrinin müdafiə nazirləri Ukraynaya hərbi yardımın növbəti addımlarını müzakirə etmək üçün yanvarın 19-da Almaniyada toplaşacaqlar.

Görüşdə ABŞ-nin müdafiə naziri Lloyd Ostinin də iştirakı gözlənilir. O vaxta qədər Şolts və yeni təyin olunacaq müdafiə naziri Almaniya istehsalı olan “Leopard” tanklarının Ukraynaya çatdırılması ilə bağlı təcili müraciətlərə cavab verməlidir.