Ana-ata qızlarına dişlərinə baxıb ər alır | Hindistanda qeyri-adi bazar - ARAŞDIRMA

Hindistanın Madxubani şəhərində qeyri-adi bazar 700 ildir ki, fəaliyyət göstərir. Bazarın ilk təçkilatçısı Raca Xari Sinqx olub.

Belə ki, bu bazarda meyvə-tərəvəz, cürbəcür qidalar yox, kişi satılır. Daha doğrusu, qızlar valideynləri ilə bura gəlib özlərinə ər axtarırlar. Bu bizim üçün qeyri-adi və imkansız görünsə də, hindlilər bura öz yarlarını axtarmağa gəlirlər.

Hindistanın bütün ştatlarından bura gəlin namizədləri öz valideynlərini gətirirlər. Bazar ildə 9 gün fəaliyyət göstərir və qiymətlər bahadır. Yəni kimsə özünə bu bazardan ər tapmaq istəyirsə, həmin 9 gün ərzində özünü çatdırmalıdır.

Kişilər özlərini təqdim etmək məqsədilə bura axışırlar. Xüsusi səliqə ilə geyinib kecinirlər, özlərinə bəzək-düzək verirlər. Qiyməti də elə özləri qoyurlar. Ailələr adətən bütün bazarı gəzib hər kəsi gözdən keçirdikdən sonra seçimlərini edirlər.

Daha sonra isə alver başlayır. Burada gəlinin sözü keçmir. Söz sahibi yalnız valideynlərdir. Alış-verişdə adətən kişiyə ya pul təklif olunur, ya da kişinin ailə quracağı qadınla birlikdə ona veriləcək əmlak. Adətən bu zaman kişiyə 3 sual verilir. Hansı kastadan olması, təhsili və dişlərinin vəziyyəti soruşulur.

Bazarda sadə kasıb əhaliyə, həkimlərə, dövlət qulluqçularına, müəllimlərə və mühəndislərə də rast gəlmək olar. Ailələr təhsil haqqında attestat və digər sənədləri tələb edirlər.

Maraqlı məqamlardan biri də odur ki, kişilər hesab edirlər ki, təhsilə xərclədikləri pul çoxdursa, qadından daha çox pul tələb edə bilərlər. Hindlilər hesab edirlər ki, boşanmaların sayı ona görə çoxdur ki, gənclər özləri tanış olurlar, ya da bir-birilərini sosial şəbəkələrdə tapırlar. Buna görə də valideynlər önə düşüb öz qızlarına bu bazardan ər axtarırlar.