Ara qarışır | ABŞ İsrailin İrana qarşı yeni hücumlarını dəstəkləyəcək? - Baku TV

Donald Tramp bildirib ki, İran iyunda dayandırdığı nüvə proqramını yenidən qurmağa cəhd edərsə, o zaman ABŞ ona qarşı tezliklə yeni hücumlar həyata keçirəcək.

O bu açıqlamanı İsrailin Baş naziri Benyamin Netanyahu ilə Floridada keçirdiyi görüş zamanı verib.

“Eşidirəm ki, İran yenidən nüvə potensialını artırmağa çalışır və əgər bu, belədirsə, biz onları dayandırmalı olacağıq. Onların ağlını başlarına gətirəcəyik. Lakin ümid edirəm ki, belə bir şey baş vermir”, – deyə Tramp bildirib.

Prezident məsələnin diplomatik yolla həllinə üstünlük verdiyini qeyd edib. “Eşitmişəm ki, İran sövdələşmə bağlamaq istəyir. Əgər onlar sövdələşmə bağlamaq istəyirlərsə, bu, daha ağıllı addım olar”, – deyə sözlərinə əlavə edib.

Görüşdə həmçinin Qəzza zolağı ilə bağlı atəşkəs razılaşması, eləcə də İran və Livandakı “Hizbullah” qruplaşması ilə bağlı məsələlər müzakirə olunub.

ABŞ Prezidenti Netanyahuya açıq dəstək nümayiş etdirib. Tramp İsrail və Fələstinin HƏMAS hərəkatı arasında əldə olunmuş atəşkəs razılaşmasının ikinci mərhələsinə mümkün qədər tez keçmək istədiyini vurğulayıb.

O eyni zamanda HƏMAS-ın tərk-silah edilməsinin vacibliyini xüsusi qeyd edib.