Atəşkəs sərhəddəki gərginliyi aradan qaldıracaq?

Pakistan və Əfqanıstan arasında hələ də daimi atəşkəs razılaşdırılmayıb. Çünki Qətər və Türkiyənin vasitəçiliyi ilə oktyabrın 19-da razılaşdırılan atəşkəs də sonradan pozulub. Ardınca İstanbul danışıqları da nəticəsiz qalıb. Lakin tərəflər noyabrın 6-da İstanbulda yenə bir araya gələcəklər.

Bundan əvvəlki danışıqlarda “Taliban”la yaranan mübahisədən sonra tərəflər görüşlərə birbaşa qatılmırdılar. Görüş gərginliyi aradan qaldırmağa çalışan vasitəçilər arasında baş tuturdu. Lakin noyabrın 6-da İstanbulda nəzərdə tutulan görüşdə “Taliban” və Pakistan nümayəndələrinin da iştirakı və atəşkəsin əldə olunması gözlənilir.

Əvvəlki müzakirələrə vasitəçilik edən Türkiyə və Qətər hər iki tərəflə əməkdaşlıqlarını davam etdirməyi təklif edib.

Pakistanın Xarici İşlər Nazirliyinin sözçüsü Tahir Andrabi oktyabrın 31-də verdiyi açıqlamada ölkəsinin vasitəçilik prosesində iştirakını davam etdirəcəyini bildirərək müsbət nəticəyə ümidvar olduqlarını söyləyib.

“Taliban”ın sözçüsü Zəbihullah Mücahid isə oktyabrın 30-da verdiyi ayrıca bəyanatda Əfqanıstanın Pakistanla “qarşılıqlı hörmət və işlərə qarışmamaq prinsipi” əsasında yaxşı münasibətlər qurmaq istədiyini qeyd edib.

Pakistan və Əfqanıstan arasında sərhəd toqquşmaları oktyabrın əvvəlində baş verib. Ölümcül döyüşlər Pakistanın hava zərbələrinə, Əfqanıstanın cavab atəşinə və ticarət, tranzit üçün istifadə olunan əsas sərhəd-keçid məntəqələrinin bağlanmasına səbəb olub. İki ölkə arasında gərginlik Pakistanın ərazisində fəaliyyət göstərən pakistanlı “Taliban” silahlılarına qarşı həyata keçirdiyi hava hücumları ilə dərinləşib.

Əfqanıstan bu hücumları öz suverenliyinin pozulması kimi qiymətləndirir. Pakistan isə Əfqanıstanı həmin silahlı qruplaşmanı gizlətməkdə ittiham edir, amma Kabil bu iddiaları rədd edir.