Atəşkəs təklifinə Netanyahudan cavab

HƏMAS hərbi qruplaşması artıq 4 aydır davam edən münaqişəyə son qoymaq üçün atəşkəslə bağlı yeni təklifini təqdim edib.

Sənəddə girov və məhbusların mübadiləsi, köçkünlərin evlərinə qayıtmasına şəraitin yaradılması və mülki əhalinin yardımla təmin edilməsi kimi müddəalar əks olunub.

Təklifə əsasən, ilk 45 günlük razılaşmada hərbi əməliyyatların müvəqqəti olaraq dayandırılması, Qəzzada və İsraildə saxlanılan qadınların, uşaqların, qocaların və xəstələrin sərbəst buraxılması, eləcə də 1 500 fələstinli məhbusun azad edilməsi nəzərdə tutulub. Növbəti 45 günlük fasilədə isə 2-ci tur girov mübadiləsinin həyata keçirilməsi, Qəzzanın humanitar yardımla təmin edilməsi, İsrail Ordusunun sözügedən əraziləri tərk etməsi və orada yenidənqurma işlərinin aparılması gözlənilir.

Razılaşmanın 3-cü 45 günlük mərhələsində isə hər iki tərəfdən olan meyitlərin və insan qalıqlarının dəyişdirilməsi, Qəzzada humanitar tədbirlərin davam etdirilməsi öz əksini tapıb. Ancaq İsrailin Baş naziri Benyamin Netanyahu HƏMAS-ın sözügedən atəşkəs təklifini qətiyyətlə rədd edib.

Hərbi qruplaşmanın münaqişədəki mövqeyini xəyalpərəst adlandıran Baş nazir müharibə ilə bağlı fikrinin dəyişmədiyini və İsrail üçün HƏMAS-ın məhv edilməsindən başqa alternativ yolun olmadığını bildirib.

“Hərbi təzyiqlərin davam etməsi girovların azad edilməsi üçün zəruri şərtdir”, – deyə o fikirlərini tamamlayıb.