Avdiivka Rusiyanın nəzarətində | Şoyqu Putinə məlumat verdi

Rusiyanın müdafiə naziri Sergey Şoyqu Prezident Vladimir Putinə Donetsk yaxınlığındakı Avdiivka şəhərinin tam nəzarətə götürülməsi barədə məruzə edib.

Bu barədə Rusiya Müdafiə Nazirliyi məlumat yayıb.

Qeyd edək ki, fevralın 17-də səhər saatlarında Ukrayna Silahlı Qüvvələrinin Baş komandanı Oleksandr Sırski Ukrayna qoşunlarının Avdiivkadan çəkilməsini elan edib.

Şəhər uğrunda döyüşlər 2023-cü ilin oktyabrından şiddətlənmişdi. Avdiivka hələ 2014-cü ildə separatçıların nəzarətinə keçən Donetskdən cəmi 15 kilometr məsafədə yerləşməklə strateji önəmə sahibdir.

Bu arada, Avdiivka şəhərinin işğalı Rusiyaya 17 min ölü daxil olmaqla 47 min itkiyə başa gəlib. Bu barədə Ukrayna Silahlı Qüvvələrinin “Tavriya” operativ-strateji qoşun qrupunun nümayəndəsi Dmitro Lixoviy deyib.

Ukrayna tərəfinin qiymətləndirməsini müstəqil mənbələrlə yoxlamaq qeyri-mümkündür. Bundan başqa, Kreml də müharibədəki, xüsusilə sözügedən döyüşdəki öz itkilərini açıqlamır. Moskva sonuncu dəfə 2022-ci ilin sentyabrında ordunun ümumi itkilərini açıqlayıb.

Avdiivka kontekstində isə Rusiya Prezidenti Vladimir Putin rəqəm çəkmədən ancaq “həlak olanlar”dan bəhs edib. Bununla belə, ABŞ kəşfiyyatı hələ 2023-cü ilin dekabrında Rusiyanın sözügedən istiqamətdəki ölü və yaralı itkilərini 13 min hesablayıb.