Avropa İttifaqı Ukraynaya külli miqdarda yardım ayıracaq

Avropa İttifaqı ölkələri birliyin sammitində 2025-ci ildə Ukraynaya 30,6 milyard avro dəyərində büdcə makromaliyyə yardımı göstərəcəyini vəd edib.

Bu barədə sammitin yekun bəyanatında deyilir.

Sənədə əsasən, bu məbləğin 12,5 milyard avrosu 2027-ci ilə qədər ümumi həcmi 50 milyard avro olacaq Avropa Ukraynaya Dəstək Fondundan ödəniləcək. 18,1 milyard avro G7-nin 45 milyard avroluq kredit proqramından ayrılacaq ki, bunun da Rusiya aktivlərinin yenidən investisiya edilməsindən əldə olunacaq gəlirlərin “müsadirə edilməsi” yolu ilə qarşılanacağı gözlənilir.

Bu arada, NATO-nun baş katibi Mark Rütte dekabrın 25-də Volodimir Zelenski ilə Ukraynaya təcili yardım məsələsini müzakirə etmək niyyətindədir. Baş katib bu barədə Brüsseldə keçirdiyi mətbuat konfransında məlumat verib.

“Biz Ukraynanı necə güclü mövqeyə gətirəcəyimizi müzakirə edəcəyik ki, Ukrayna danışıqlara qərar verəndə ölkə güclü mövqeyə malik olsun”, – deyə Mark Rütte qeyd edib.