Avropa liderləri narazı və məyus oldular

Avropa liderləri və Ukrayna Prezidenti Volodimir Zelenski ABŞ Prezidenti Donald Trampla Rusiyanı müharibəni dayandırmağa məcbur etmək üçün ona qarşı təzyiqlərin artırılması məsələsini müzakirə ediblər.

"İnterfaks-Ukrayna" xəbər verir ki, bunu Zelenski Parisdə Fransa Prezidenti Emmanuel Makronla birgə mətbuat konfransı zamanı deyib.

"Prezident Trampla danışdıq, ona verdiyi dəstəyə görə təşəkkür edirik. Vəziyyəti sülhə doğru necə çevirmək barədə uzun və ətraflı söhbətimiz oldu. Müxtəlif variantları müzakirə etdik, amma ən əsası təzyiqdir, iqtisadi tədbirlər də daxil olmaqla, güclü tədbirlərlə müharibəni dayandırmağa məcbur etmək üçün atılacaq addımlardır. Sülhün açarı Rusiya maşınını, resurslardan məhrum etməkdir", ‒ deyə Zelenski vurğulayıb.

"Bild" qəzetinin məlumatına görə isə "İstəklilər koalisiyasının" üzvləri arasında Donald Trampla telefon danışığından sonra narazılıq və məyusluq yaranıb. İddiaya görə, Avropa tərəfi Trampın Rusiyaya qarşı sanksiyalar tətbiq etmək qərarına gələcəyini gözləmir.

Avropalılar Rusiyaya qarşı yeni sanksiyaların tətbiqi məsələsi üzrə birgə işçi qrupunun yaradılması üçün ABŞ Prezidenti ilə birgə yanaşmanın əlaqələndirilməsini və 48 saat ərzində öz nümayəndələrini Vaşinqtona göndərməyi təklif ediblər.

"Lakin Trampın buna razı olub-olmadığı aydın deyil", ‒ deyə nəşr bildirib. 

Qeyd olunub ki, Ağ Ev rəhbəri Avropa İttifaqını Rusiya neftinin idxalını davam etdirməkdə ittiham edib.