Avropa Parlamentində korrupsiya qalmaqalı
Aprelin 4-ü səhər saatlarında Belçika və Almaniya polisi “European People’s Party” – Avropa Xalq Partiyasının Brüsseldəki ofislərində reyd keçirib.
Bu partiya Avropa səviyyəsində ən böyük partiyadır və onun qrupu Avropa Parlamentində ən çox yerə sahibdir, qərargahı Brüsselin Avropa məhəlləsində, “Rue du Commerce”də yerləşir.
Avropa Xalq Partiyasının sözçüsünün açıqlamasına görə, yoxlamalar Almaniyanın Türingiya əyalətində davam edən araşdırma ilə bağlıdır. Partiya aidiyyəti orqanlarla tam şəffaf şəkildə əməkdaşlıq edir, bütün müvafiq məlumat və sənədləri təqdim edir.
Alman mediası isə fərqli yazır. Bildirilib ki, araşdırma partiyaya və onun hazırkı işçilərindən hər hansı birinə qarşı deyil, korrupsiya və rüşvətxorluqda şübhəli bilinən Almaniya Xristian Demokratik İttifaqının Türingiyadakı lideri Mario Voigta qarşı yönəlib.
M.Voigt 2019-cu il seçki dövrü ərzində EPP-də çalışıb. Bildirilir ki, müstəntiqlər M.Voigtin 2019-cu il seçkilərində Partiyanın kampaniyasının keçirilməsinə görə aldığı vəsaitin miqdarını müəyyən etməyə çalışırlar. Ancaq o, ittihamları rədd edir.