Avropalı fermerlərin etiraz aksiyası davam edir

Strasburqda Avropa İttifaqının bir neçə ölkəsindən olan fermerlər Merkosur sazişinə etiraz ediblər.

Tələblərdən biri Avropa Komissiyası rəhbərinin istefası olub. Etirazçılar "Ursula fon der Lyayen, evə get" yazılı plankartlar açıblar.

Fermerlər bildirirlər ki, saziş Latın Amerikasından daha ucuz kənd təsərrüfatı məhsullarının Aİ bazarına daxil olmasına şərait yaradacaq və bu da yerli istehsalçılara ciddi zərbə vuracaq.

Etiraz aksiyası Avropa Parlamentinin sazişə qarşı qaldırılan hüquqi iddia ilə bağlı səsverməyə hazırlaşdığı vaxta təsadüf edib.

Avropa Parlamenti yanvarın 21-də məsələni Aİ Məhkəməsinə göndərib-göndərməmək və razılaşmanın ratifikasiyasını dayandırmaq imkanını müzakirə edərək səsə qoyacaq.

Qeyd edək ki, Aİ və Merkosur ölkələrinin yüksəksəviyyəli rəsmiləri yanvarın 17-də Paraqvayda ticarət sazişini imzalayıblar. Bununla da 25 il davam edən danışıqlardan sonra Avropa İttifaqının tarixində ən böyük ticarət razılaşması qeydə alınıb.