Avropalılar Zelenskini Trampın yanına tək göndərmək istəmir

Ukrayna Prezidenti Volodimir Zelenski ABŞ Prezidenti Donald Trampla görüşə hazırlaşır.

Bu barədə dövlət başçısı özünün teleqram kanalında xəbər verib.

"Bazar ertəsi Prezident D.Trampla görüşə hazırlaşırıq. Dəvət üçün təşəkkür edirik. Bütün detalları aydınlaşdırmaq, hansı addımların lazım olduğunu və nəticə verəcəyini ümid etmək üçün hamının liderlər səviyyəsində söhbətə ehtiyac olması ilə razılaşması vacibdir", − deyə Ukrayna Prezidenti yazıb.

Görüş V.Zelenskinin fevralın sonunda D.Tramp və ABŞ vitse-prezidenti Cey Di Vens ilə Oval kabinetdə yaranan mübahisədən sonra Ağ Evə ilk səfəri olacaq.

Oxşar vəziyyətin təkrarlanmaması üçün Böyük Britaniyanın Baş naziri Kir Starmer, Almaniya Kansleri Fridrix Merts və Fransa Prezidenti Emmanuel Makron da Vaşinqtona gedə bilər. İtaliyanın Baş naziri Corciya Meloni isə planlaşdırılan bu görüş üçün ABŞ-yə gedib-getməmək barədə düşünür.

“Politico”nun yazdığına görə, avropalı siyasətçilər öz təmsilçiləri − Finlandiya Prezidenti Aleksandr Stubbu ABŞ Prezidenti Donald Trampla görüş üçün Ukrayna Prezidenti Volodimir Zelenski ilə birlikdə Vaşinqtona göndərməyi planlaşdırırlar.

Nəşr qeyd edir ki, avropalılar D.Tramp və V.Zelenski arasında münasibətlərin hər hansı kəskinləşməsinin qarşısını almaq və ABŞ Prezidentini Avropanı gələcək danışıqlara cəlb etməyə inandırmaq üçün A.Stubba ümid edirlər.

Qəzetin yazdığına görə, D.Trampla yaxın münasibət quran NATO-nun Baş katibi Mark Rutte də V.Zelenski ilə eyni vaxtda Vaşinqtona səfər edə bilər.