Avstraliyanın Baş nazirinin BMT Baş Assambleyasında çıxışı diqqət çəkdi

“İranın cinayətkar və qorxaq addımlarına cavab olaraq İslam Respublikasının Avstraliyadakı səfiri ölkədən çıxarılıb”.

Bu fikirləri Avstraliyanın Baş naziri Entoni Albanez BMT Baş Assambleyasında çıxışı zamanı səsləndirib.

“Terrorçular və terrorizmi dəstəkləyən dövlətlər nifrət yayırlar. Əgər əvvəllər beynəlxalq hüquq pozuntularının bizi maraqlandırmadığını və dünyanın başqa bir hissəsindəki münaqişə və qarışıqlığın bizə təsir edə bilməyəcəyini düşünmək lüksünə sahib idiksə, elə keçən ay Avstraliya təhlükəsizlik orqanları təsdiqlədi ki, Melburndakı sinaqoqun və Sidney şəhərindəki yəhudi restoranının yandırılmasını İran təşkil edib. Bunlar qorxu yaymaq məqsədi daşıyan cinayət əməlləridir. Biz İran səfirini ölkədən qovduq, bu, İkinci Dünya müharibəsindən bəri Avstraliyanın belə bir addım atdığı ilk haldır”, – deyə o qeyd edib.

Baş nazir habelə vurğulayıb ki, BMT tribunasından bir daha dünyaya açıq mesaj verilir:

“Dünyada antisemitizmə yer yoxdur”.