Başı olmayan nəhəng piton tapıldı, üzə çıxdı ki... | "Qatil" necə aşkarlandı?

Floridanın Everqleyz bölgəsində tədqiqatçılar tərəfindən izlənilən 4 metrlik bir pitonun cəsədi başsız halda meşədə tapılıb.

"Live Science" portalının məlumatına görə, qandonduran hadisənin sirri qısa müddət sonra açılıb, "qatil" kameraya düşüb.

Hadisə ABŞ-nin Cənub-Qərbi Florida bölgəsində qeydə alınıb. Bioloq Yan Bartoszekin rəhbərlik etdiyi tədqiqat qrupu uzun illərdir izini sürdükləri "Loki" adlı tünd pələngvari pitonun cəsədini Neapol şəhəri yaxınlığında meşədə aşkar edib.

Pitonun başı və boynu dişlənərək cəsəddən ayrılıb və iynəyarpaqlı ağacların budaqları altında gizlədilib. Bu isə ilk baxışda hücumun bir yırtıcı məməli tərəfindən edildiyini göstərib.

Tədqiqatçılar hadisə yerinə müşahidə kameraları yerləşdiriblər. Ertəsi gün həmin əraziyə geri qayıdan heyvan kameralara düşüb. Beləliklə, bu, bir vaşaq olub.

Qeyd edək ki, adətən vaşaqlar pitonlara yem olur. Mütəxəssislərin sözlərinə görə, pitonlar Floridada yerli canlılar üçün ən böyük təhlükə yaradır. Onlar vaşaqlar da daxil olmaqla bir çox heyvana hücum edə bilir. Lakin bu hadisə göstərdi ki, yerli yırtıcılar da yeni şərtlərə uyğunlaşaraq özlərini qorumağa, hətta əks-hücuma keçməyə qadirdir.