Başqa orduların ərazilərimizə buraxılmasına maneə yoxdur | Ali Radanın komitə sədri

Ukraynada gedən müharibəyə Qərb dövlətlərinin ordularının cəlb olunması məsələsi ölkədə ciddi müzakirələrə səbəb olub. Vətəndaşların bir qismi bu fikri alqışlasa da, digərləri bunun qanunla qadağan olduğunu deyir.

Ekspertlər hesab edirlər ki, siyasi iradə tapılarsa, bu məsələdə hüquqi bazanı tənzimləmək mümkündür.

“Ukrayna ərazisində xarici hərbi qüvvələrin yerləşdirilməsi məsələsi siyasi dairələrdə geniş müzakirə olunur. Bu ideya ilə bağlı konstitusiyaya dəyişiklik edilməsinə gəldikdə, şəxsən mən hüquqşünas və beynəlxalq ekspert kimi bu məsələdə ziddiyyət və fikir ayrılıqları görmürəm. Çünki konstitusiyada vətəndaşların, rəhbərliyin ölkənin ərazi bütövlüyünün təmin edilməsi, milli dövlətçilik, müdafiəsinə bağlı fundamental əsaslar öhdəliklər kimi müəyyən edilib.

Bu ilin ilk aylarında ABŞ, Fransa, Almaniya və sair ölkələrlə bir sıra sənədlərə imza atılıb. Bir vacib məqam ondan ibarətdir ki, bu sənədlər ümumi təhlükəsizliyi əhatə edir. Yəni onlar qoşun yeridilməsini nəzərdə tutmur. Hesab edirəm ki, siyasi iradə və Ukrayna tərəfindən müraciət olarsa, hüquqi baza tapılacaq. Bu halda məsələdə hüquqi ziddiyyət görmürəm”, – beynəlxalq ekspert Andrey Buzarov bildirib.

Ukraynada Ali Radanın Müdafiə və təhlükəsizlik komitəsinin sədri Fedor Venislavski isə qeyd edir ki, müharibə şəraitində ölkənin suveren təhlükəsizliyi səbəbi ilə bu məsələ konstitusiyaya zidd deyil.

“Nə milli qanunvericilik, nə də beynəlxalq hüquq nöqteyi-nəzərindən başqa dövlətlərin silahlı qüvvələrinin Ukrayna ərazisinə buraxılmasına və ərazimizin azad edilməsində onların köməyini qəbul etməsinə heç bir maneə yoxdur. Yəni beynəlxalq hüquq normaları, milli qanunvericilik, Ukrayna Konstitusiyası bizə bu məsələləri həll etməyə imkan verir. Şübhə yoxdur ki, ərazilərimizin azad edilməsində potensial olaraq iştirak edəcəklərinə qərar verə bilən müttəfiqlərimiz bizim imkanlarımızı gücləndirəcək və müharibənin daha tez bitməsinə töhfə verəcəklər”, – o vurğulayıb.