Bayden HƏMAS-ın məqsədini açıqladı: ABŞ Prezidenti xalqa müraciət etdi

“HƏMAS-ın mövcudolma məqsədi İsrail dövlətinin məhv edilməsi və yəhudi xalqının öldürülməsidir. HƏMAS Fələstin xalqını təmsil etmir. HƏMAS mülki fələstinlilərdən canlı qalxan kimi istifadə edir və günahsız fələstinli ailələr buna görə çox əziyyət çəkirlər”.

Bu sözləri ABŞ Prezidenti Co Bayden deyib.

Bayden bildirib ki, Putin Ukraynanın real dövlətçiliyinin olub-olmadığını inkar edir: “O, Ukraynanı Sovet İttifaqının yaratdığını iddia edir və cəmi iki həftə əvvəl Putin dünyaya demişdi ki, ABŞ və müttəfiqlərimiz geri çəkilsə, Ukraynaya hərbi dəstək olmayacaq və bir həftə ömrü qalacaq. Amma biz geri çəkilmirik”.

Ağ Ev lideri Kiyevə yardımı dayandırmaq niyyətində olmadığını, hətta ABŞ Konqresinə həm Ukrayna, həm də İsrailə görə yeni yardım paketləri üçün müraciət edəcəyini bildirib: “Dünyanı bir yerdə saxlayan Amerika rəhbərliyidir. Buna görə də mən Konqresə təcili büdcə sorğusu göndərəcəyəm ki, Amerikanın milli təhlükəsizliyini maliyyələşdirmək üçün İsrail və Ukrayna kimi kritik tərəfdaşlarımıza maliyyə dəstəyi lazımdır. Bu, Amerika təhlükəsizliyi üçün nəsillər boyu dividendlər ödəyəcək ağıllı bir investisiyadır”.

Bayden Qəzzadakı Əl-Əhli xəstəxanasının vurulmasına bir daha diqqət çəkərək bunu israillilərin etmədiyini bildirib. “Biz birmənalı olaraq antisemitizmi, birmənalı şəkildə islamofobiyanı pisləməliyik”, – deyə ABŞ Prezidenti sözlərinə əlavə edib.