Bayden Prezidentləri səhv saldı, gülünc duruma düşdü

ABŞ Prezidenti Cozef Bayden bir gündə 2 səhv edib.

Ağ Ev lideri əqli qabiliyyətini tənqid edənlərə cavab olaraq yaddaşının yerində olduğunu bildirib:

“Mən yaxşı niyyətli yaşlı bir adamam, nə etdiyimi də yaxşı bilirəm. Mən bu ölkənin prezidentiyəm və dövləti mən ayağa qaldırmışam”.

Yaddaşının yaxşı olduğunu deyən C.Bayden bu açıqlamadan sonra gülünc vəziyyətə düşüb. O, İsrailin Baş nazirinin adını unudub. Ağ Ev liderinin unutqanlığı təkcə bu da deyil.

C.Bayden daha sonra Misir Prezidenti Əbdülfəttah əs-Sisini Meksika Prezidenti kimi təqdim edib: “Bildiyiniz kimi, Meksika Prezidenti Sisi humanitar yardımların çatdırılması üçün əvvəlcə qapıları açmaqdan imtina edib”.

ABŞ lideri çıxışı zamanı İsrail ilə HƏMAS arasında girovların azad edilməsi və Qəzza zolağında hərbi əməliyyatların dayandırılmasına yönələn atəşkəs razılaşmasının mümkünlüyünü şərh edib.

Xatırladaq ki, 2023-cü ilin fevralında Ağ Ev 81 yaşlı C.Baydenin tamamilə sağlam olduğunu və prezidentlik fəaliyyətini davam etdirmək üçün heç bir probleminin olmadığını açıqlayıb. Çıxışları zamanı tez-tez ayağı büdrəyən və ölkə rəsmilərinin adını unudan, dəyişik salan Ağ Ev lideri ilə bağlı bu açıqlama birmənalı qarşılanmayıb.