Baydenin yolunu gedən Kamala Harris barədə bilinməyənlər | ABŞ-ni nə gözləyir?

İyulun 21-də ABŞ-nin hazırkı lideri Cozef Bayden prezident seçkisində iştirak etməkdən imtina edib.

Koronavirusa yoluxan ölkə rəhbəri ətrafındakı şəxslərin də təzyiqi ilə geri çəkilib və vitse-prezident Kamala Harrisin namizədliyini müdafiə edib. Beləliklə də, sabiq Ağ Ev rəhbəri və prezidentliyə namizəd Donald Tramp vitse-prezident Kamala Harrislə mübarizə aparacaq.

Atası Yamayka, anası Hindistanəsilli olan Kamala Devi Harris 1964-cü ilin oktyabrın 20-də Kaliforniyanın Oklənd şəhərində anadan olub. 25 yaşında Kaliforniya Universitetinin Hüquq fakültəsindən məzun olduqdan sonra o, vəkil kimi fəaliyyətə başlayıb.

1990-2010-cu illərdə San-Fransisko prokuroru, daha sonra Kaliforniyanın Baş prokuroru vəzifələrində çalışıb. 2016-cı ildə isə Demokratlar Partiyasından senator seçilib. Ölkənin ilk qaradərili qadın senatoru olan K.Harris həm də ilk hindəsilli senator olub.

2020-ci ildə prezident seçkilərində uğur qazana bilmədiyi üçün geri çəkilən xanım K.Harris 2021-ci ildə vitse-prezident vəzifəsinə seçilib. Bununla da o, ABŞ-də seçilmiş ilk afroamerikalı vitse-prezident kimi tarixə düşüb.