BBC dezinformasiya yayır? : İsrail ordusunun BBC-dən tələbi

İsrail Müdafiə Qüvvələrinin rəsmi nümayəndəsi Peter Lerner Britaniyanın BBC telekanalından yanlış məlumat verdiyinə görə üzr istəməsini tələb edib.

O qeyd edib ki, telekanal “Əl-Şifa” xəstəxanasının HƏMAS tərəfindən hərbi məqsədlər üçün istifadəsi ilə bağlı İsrailin əlində heç bir dəlil olmadığına dair iddialı material yayımlayıb.

SAXAL-ın nümayəndəsi buna görə telekanalın səhvini etiraf etməsini istəyib. O, çıxışının videoyazısını İsrail Müdafiə Qüvvələrinin “X” hesabında paylaşıb. Qeyd edib ki, İsrail hərbçiləri reydlər zamanı xəstəxananın altında 55 metr uzunluğunda möhkəmləndirilmiş zirehli qapısı olan tunel, o cümlədən odlu silahlar, rabitə vasitələri və tank əleyhinə qumbaraatanlar aşkar ediblər.

“Ümumdünya Səhiyyə Təşkilatının bunu qınamasını gözləyirik. BBC üzr istəyəcəkmi? Ceremi Bouen səhv etdiyini etiraf edəcəkmi?” – deyə sual ünvanlayıb.

Xatırladaq ki, ötən həftə BBC-nin redaktoru Ceremi Bouen İsrail Ordusunun əlində “Əl-Şifa” xəstəxanasında HƏMAS-ın baş qərargahı olduğuna dair sübutların varlığından şübhə etdiyini bildirib.

Qeyd edək ki, İsrail Müdafiə Qüvvələri rəsmi “Telegram” səhifələrində “Əl-Şifa” xəstəxana kompleksinin altında aşkar etdikləri tunel barədə məlumat verib. İsrail Müdafiə Qüvvələri tunelin marşrutunu araşdırmağa davam edir.