İsrailin hərəkətlərinə Vaşinqtondan gözlənilməz reaksiya gəlib - Baku TV

İsrail Müdafiə Qüvvələrinin Baş qərargah rəisi general-leytenant Eyal Zamir Suriya qüvvələrinin sərhəd yaxınlığında möhkəmlənməsinə icazə verməyəcəyini bəyan edib.

General bu barədə Suriyanın cənubundakı İsrail təhlükəsizlik zonasına səfəri zamanı bildirib.

"Suriya istiqamətindəki inkişafları izləyirik. Düşmən qüvvələrin sərhədlərimiz yaxınlığında möhkəmlənməsinə imkan verməyəcəyik və döyüş qabiliyyətlərimizi necə və harada dəqiq tətbiq edəcəyimizi ətraflı şəkildə izah edəcəyik", – deyə o qeyd edib.

Bu bəyanat İsrailin Suriyanın şimal-qərbindəki İdlib əyalətindəki Əbu əd-Duhur hava bazasına zərbə endirməsindən bir gün sonra verilib.

İsrail tərəfi iddia edib ki, əməliyyatın məqsədi Türkiyə qoşunlarının hərbi bazada yerləşdirilməsinin qarşısını almaqdır və Təl-Əviv bunu mövcud təhlükəsizlik sisteminin pozulması kimi görür.

Bu arada, ABŞ-nin Təl-Əvivdəki səfiri Mayk Hakabi "Əl-Ərəbiyyə" kanalına müsahibəsində İsrailin işğal altındakı Qərbi Şeriyadakı hərəkətlərini "terrorizm" adlandırıb. O, bu açıqlamanı fələstinlilərə qarşı yeni zorakılıq dalğası fonunda verib.

Səfir əvvəllər açıq şəkildə İsrailin fəaliyyətini dəstəkləyib. Amerikalı səfirin yeni açıqlamaları isə İsrailə Qərb Şəriyəsində zorakılığın qarşısını almaq və məsul şəxsləri məsuliyyətə cəlb etmək üçün təzyiqi artırır.