Berlinin yeni müdafiə silahı | “Arrow” NATO-nun da təhlükəsizliyi üçün əhəmiyyətlidir - Baku TV

Almaniya dekabrın 3-də “Arrow” hava hücumundan müdafiə sistemini rəsmi olaraq istismara verərək bu texnologiyanı yerləşdirən ilk Avropa ölkəsi olub.

Rəsmi mərasim Berlinin təxminən 100 kilometr cənubunda yerləşən “Schoenewalde” hərbi hava bazasında keçirilib.

Yeni sistem Rusiyanın “Oreşnik” kimi ortamənzilli ballistik raketlərini havada məhv etmək üçün nəzərdə tutulub və Berlin bu addımı Moskvadan gələn artan təhlükəyə qarşı mühüm tədbir kimi qiymətləndirir.

Məlumata görə, “Arrow” sistemi Yer səthindən 100 kilometrdən yuxarıda, yəni atmosferdən kənarda fəaliyyət göstərir, 2400 kilometr məsafədə isə hədəfləri vurmaq qabiliyyətinə malikdir.

Stasionar xarakter daşıyan bu sistem “Patriot” kimi yük maşınları üzərində daşınan daha qısamənzilli hava hücumundan müdafiə vasitələrini tamamlayır.

Almaniya Hərbi Hava Qüvvələrinin baş inspektoru Holger Neymann bildirib ki, “Arrow” sistemi təkcə Almaniya üçün deyil, bütövlükdə NATO-nun təhlükəsizliyi üçün həyati əhəmiyyət daşıyır.