Beynəlxalq Cinayət Məhkəməsi qərar verdi | Elə şeylər açıqlandı ki...

Beynəlxalq Cinayət Məhkəməsi İsrailin Baş naziri Benyamin Netanyahu, ölkənin sabiq müdafiə naziri Yoav Qallant və HƏMAS rəsmilərinə qarşı həbs orderi çıxarıb.

Quplaşma üzvləri arasında Məhəmməd Deif, Yəhya Sinvar və İsmayıl Haniyənin adları da öz əksini tapıb. Onların hər biri Qəzza müharibəsi, 2023-cü ilin oktyabrında baş verən hücumlar və bəşəriyyətə qarşı cinayət əməllərinə görə ittiham olunurlar.

Qərar B.Netanyahunu beynəlxalq axtarışda olan şəxsə çevirdiyindən atəşkəs danışıqlarının aparılmasını çətinləşdirəcək. Lakin İsrail və onun əsas müttəfiqi ABŞ Beynəlxalq Cinayət Məhkəməsinin üzvü olmadığı, bundan əlavə, HƏMAS-ın bir neçə rəsmisi münaqişə zamanı öldürüldüyü üçün nəticələrin məhdudlaşacağı gözlənilir.

Qeyd edək ki, İsrailin Baş naziri məhkəmənin Baş prokuroru Kərim Xanın həbs tələbini rüsvayçı və antisemitizm halı hesab edib. ABŞ Prezidenti Cozef Bayden isə prokuroru tənqid edərək İsrailin HƏMAS-a qarşı özünü müdafiə etmək hüququnu dəstəklədiyini bildirib. HƏMAS hərbi qruplaşmasının rəsmiləri də bu addımı pisləyiblər.

Məlumat üçün bildirək ki, məhkəmənin qərarına baxmayaraq, şübhəlilərin hakim qarşısında cavab verməsi gözlənilmir. Bununla belə, həbs təhlükəsi B.Netanyahu və Y.Qallantın xaricə səyahətlərini çətinləşdirə bilər.