Beynəlxalq rezonans doğuran hücumda "Əl-Cəzirə"nin 5 əməkdaşı hədəf alındı | İsrail cavab verdi

Qəzzada İsrailin hücumu nəticəsində Qətərin “Əl-Cəzirə” telekanalının 5 jurnalisti həlak olub.

Bu barədə kanaldan məlumat verilib. Qeyd edilir ki, telekanalın müxbirləri Ənəs əl-Şərif və Məhəmməd Kreike, həmçinin fotoqraf və operatorlar İbrahim Zaher, Məhəmməd Noufəl və Moamen Aliva hücum zamanı həyatlarını itiriblər. Onlarla birlikdə daha iki nəfər həlak olub.

“Əl-Cəzirə” Media Şəbəkəsi isə İsrailin Qəzzada törətdiyi son hücumu ən sərt şəkildə qınayıb.

Şəbəkə bildirir ki, İsrail qüvvələri media nümayəndələrini qəsdən hədəf alaraq şəhid edib. Onlar Əş-Şifa Tibb Kompleksinin qarşısında yerləşən çadırda olarkən vurulublar. Bu, mətbuat azadlığına qarşı açıq və məqsədli hücum kimi dəyərləndirilir.

“Əl-Cəzirə” bəyan edir ki, İsrailin bu addımı Qəzzadakı amansız hücumların, mülki əhalinin aclığa məhkum edilməsinin və icmaların məhv edilməsinin fonunda atılıb. Şəbəkə hesab edir ki, bu qətllər Qəzzanın qarşıdakı işğalını ifşa edən son səsləri susdurmaq cəhdidir.

Ənas əl-Şərif və həmkarları, beynəlxalq medianın zolağa girişinə qadağa qoyulduğu bir vaxtda oradan yerində, senzurasız məlumat verən azsaylı jurnalistlərdən idi. Onlar aclığı, dağıntını və bombardmanı həm sənədləşdirir, həm də yaşayırdılar.

İsrail ordusundan isə bildirilib ki, 28 yaşlı Ənas əl-Şərif HƏMAS hərəkatının “terror qruplaşmasına” rəhbərlik edib. Rəsmi açıqlamada deyilir ki, o, İsrailin mülki əhalisinə və ordu bazalarına “raket hücumlarına görə” cavabdeh idi və onun “Əl-Cəzirə” ilə əməkdaşlığı bu fəaliyyəti gizlətmək üçün nəzərdə tutulub.