Bir ölkənin ümidsiz mübarizəsi: Sular yüksəlir, ada yox olur

Sakit okeanın ortasında kiçik bir ada dövləti var ki, o, yoxolma təhlükəsi ilə üzləşib.

Dəniz səviyyəsinin qalxması təxminən 11 min nəfərin yaşadığı Tuvaluya birbaşa təhdid yaradır.

Mütəxəssislərin sözlərinə görə, qarşıdakı 25 il ərzində yüksək qabarma zamanı ölkə demək olar ki, tamamilə su altında qala bilər. Bu ssenari sadəcə fəlakət deyil, həm də Tuvalunun fiziki varlığının sonu deməkdir.

Ölkə bir tərəfdən beynəlxalq arenada mübarizə apararkən, digər tərəfdən daxildə də həll yolları axtarır. Paytaxt Funafutidə sahil xətləri möhkəmləndirilib, torpaq bərpa işləri ilə ərazi bir metr qaldırılıb. Amma bu tədbirlərin məhdud təsirli olduğu da aydındır.

Köç artıq real mövzuya çevrilib. Adanın problemi yalnız dəniz səviyyəsinin qalxması ilə məhdudlaşmır. Okean suları adanın yeraltı şirin su ehtiyatlarını da duzlandırır. Bu isə əhalini demək olar ki, tamamilə yağış suyundan asılı vəziyyətə salır.

Hazırda Tuvalu yalnız sahillərini deyil, həm də gələcəyini müdafiə etməyə çalışır.