“Birinci quyruğu ayrılıb, sonra...” | Türkiyə təyyarəsi barədə ilkin tapıntılar nəyi ortaya çıxardı?

"Qara qutu"ların deşifr edilməsi və ilkin tapıntıların əldə edilməsi prosesi ən azı iki ay çəkəcək".

Bu sözləri Türkiyənin Milli Müdafiə Naziri Yaşar Gülər Azərbaycan-Gürcüstan sərhədində qəzaya uğrayan "C-130" hərbi yük təyyarəsinin "qara qutu"su ilə bağlı son açıqlamasında deyib.

Jurnalistlərin suallarını cavablandıran nazir bildirib ki, dəqiq olmasa da, ilkin tapıntılara görə demək olar ki, təyyarənin quyruğu birinci ayrılıb. Daha sonra isə üç yerə bölünüb. "Qara qutu"dan aşkarlanan informasiya ilə bütün bunlar dəqiqləşdiriləcək. Hazırda araşdırma davam etdirilir.

"Biz 1957-ci ildən bəri "C-130"ları istismar edirik. 1999-cu ildə bir dəfə mühərrik yanğını baş vermişdi və o, təhlükəsiz şəkildə yerə enmişdi. Buna görə də deyə bilərik ki, ümumiyyətlə, "C-130" təhlükəsiz bir təyyarədir", – deyə Yaşar Gülər sözlərinə əlavə edib.

Qeyd edək ki, bundan əvvəlki açıqlamada "qara qutu"larla bağlı informasiyanın noyabrın 23-dək açıqlanacağı bildirilmişdi.