BMT Afrikanı real ölçülərdə göstərən xəritəyə keçidi artıq rəsmən dəstəkləyir - Baku TV

Dünya xəritəsi dəyişməsə də, onun necə təsvir olunması ilə bağlı yeni mərhələ başlayır.

BMT Baş Assambleyası qitələrin həqiqi ölçülərini daha düzgün göstərən xəritə proyeksiyasının geniş istifadəsini təşviq edən qətnamə qəbul edib.

Afrika ölkələrinin təşəbbüsü ilə hazırlanan “Xəritəni düzəlt” adlı qətnaməni 164 ölkə dəstəkləyib, altı ölkə bitərəf qalıb. ABŞ isə sənədin əleyhinə səs verən yeganə ölkə olub.

Məsələ uzun illərdir istifadə edilən Merkator proyeksiyasındakı ölçü fərqləri ilə bağlıdır. Naviqasiya üçün əlverişli hesab olunan bu xəritədə qütblərə yaxın ərazilər olduğundan daha böyük görünür. Nəticədə, Afrika real ölçüsündən xeyli kiçik təsvir edilir.

Məsələn, xəritədə Qrenlandiya Afrika ilə demək olar ki, eyni ölçüdə görünür. Əslində isə Afrika Qrenlandiyadan təxminən 14 dəfə böyükdür.

Qətnamə daha real təsvir imkanları verən “Equal Earth” proyeksiyasının məktəblərdə, mediada, dərsliklərdə və rəqəmsal platformalarda istifadəsinin təşviqini nəzərdə tutur. Sənəd hüquqi baxımdan məcburi deyil və Merkator proyeksiyasının naviqasiyada istifadəsini məhdudlaşdırmır.

Vaşinqton təşəbbüsü ideoloji gündəm kimi qiymətləndirərək qətnaməyə qarşı çıxıb. Afrika ölkələri isə qərarı qitənin real ölçüsünün və qlobal əhəmiyyətinin daha düzgün təqdim olunması baxımından tarixi addım hesab edir.