BMT İsraillə bağlı səsverməni təxirə saldı
BMT Təhlükəsizlik Şurası Qəzza zolağında müharibə ilə bağlı səsverməni təxirə salıb.
Yerli mətbuatın məlumatına görə, səsvermə dekabrın 19-na qədər uzadılıb. Buna səbəb isə sənədi təşkilata təqdim edən Birləşmiş Ərəb Əmirliklərinin dekabrın 18-nə təyin edilmiş səsvermənin bir günlük təxirə salınmasını xahiş etməsi olub.
“Yaxın Şərqlə bağlı yeni qətnaməyə səs vermək üçün Təhlükəsizlik Şurasının iclasının keçiriləcəyi gözlənilsə də, iclas qurumun dekabrın 18-nə olan iş qrafikindən çıxarılıb. BƏƏ-nin müraciəti ilə BMT Təhlükəsizlik Şurası Yaxın Şərq üzrə görüşü növbəti günə təxirə salmağı planlaşdırır”, – deyə qurumdan jurnalistlərə verilən açıqlamada bildirilib.
Qeyd edək ki, sözügedən qətnamə Qəzzada müharibənin təcili dayandırılmasını tələb edir. BƏƏ, Misir və Fələstinin sponsorluğu ilə hazırlanan sənəd ümumilikdə 16 bənddən ibarətdir və Qəzza zolağına humanitar yardımın artırılmasına dəstək məqsədi daşıyır.
Qətnamə layihəsində xüsusilə keçid məntəqələri vasitəsilə Qəzzaya humanitar yardımın asanlaşdırılması, anklavın mövcud ehtiyaclarını ödəmək üçün yanacaq tədarükü, BMT obyektlərinin və personalının mühafizəsi məsələləri əksini tapıb.
Eyni zamanda sənəddə humanitar hüququn hər hansı pozuntusu, o cümlədən mülki şəxslərə və obyektlərə edilən hücumlar, mülki şəxslərə qarşı zorakılıq, terror aktları qətiyyətlə pislənir.