Braziliyanın Rio-de-Janeyro çimərliklərində ekoloji balansın pozulması ilə bağlı xəbərdarlıq edildi

Bir zamanlar Rio-de-Janeyronun çimərliklərini bəzəyən “Emerita analoga” adlandırılan köstəbək xərçəngləri artıq bölgədən tamamilə yox olub.

Bu barədə Rio-de-Janeyro Federal Universitetinin alimləri məlumat veriblər.

Tədqiqatçılar bildirirlər ki, bu sevimli heyvanların azalmasının əsas səbəbləri insan fəaliyyəti və ətraf mühitdə baş verən dəyişikliklərdir.

“Buraya çimərliklərdəki birbaşa təsirlər – ayaq altında tapdalanma, avtomobil hərəkəti, şəhər təmizliyi zamanı istifadə olunan mexaniki avadanlıqların təzyiqi və insanların onların yaşam arealında yaratdığı narahatlıq daxildir. Eyni zamanda çirkab sularının, sənaye və məişət mənşəli tullantıların dənizə axıdılması da bu canlılar üçün əlavə təhlükə yaradır. Bu amillərin hər biri köstəbək xərçənginin populyasiyasına ciddi mənfi təsir göstərir”, ‒ tədqiqatçı Tatyana Medeyros Barbosa söyləyib.

Araşdırma qrupu bu prosesin həm ekoloji tarazlığa, həm də insan sağlamlığına mümkün təsirləri barədə xəbərdarlıq edib.

Qeyd olunub ki, bu cür canlıların yox olması yalnız Braziliyada deyil, həmçinin Meksika, Uruqvay və ABŞ kimi ölkələrdə də müşahidə olunur.

Alimlər biomüxtəlifliyin qorunması üçün təcili tədbirlərin görülməsinin vacibliyini vurğulayırlar.