Bu baş verməsə, öləcəkdim | Trampdan sui-qəsd cəhdi barədə açıqlama

ABŞ-nin sabiq prezidenti Donald Tramp Respublikaçılar Partiyasının onun prezidentliyə namizədliyini irəli sürməsi təklifini rəsmən qəbul edib.

O, Miluokidə keçirilən Respublikaçılar Partiyası Milli Qurultayının son günündə bunu təsdiq edən sənədə imza atıb.

Daha sonra D.Tramp ictimaiyyət qarşısında çıxış edib:

“Həmin gün Pensilvaniyanın Batler qəsəbəsində çox gözəl, adi bir gün idi. Arxadan musiqi səsləri eşidilirdi. Seçki kampaniyası öz axarı ilə gedirdi. Mən səhnəyə çıxdım və insanlar böyük coşqu ilə məni alqışlamağa başladılar. Hamı çox xoşbəxt idi. Administrasiyamın cənub sərhədində immiqrasiya ilə bağlı gördüyü işlər barəsində danışmağa başladım. Mən buna görə özümlə qürur duyurdum. Arxa tərəfimdə rəhbərliyim altında sərhəddən qanunsuz keçidləri əks etdirən qrafikin nümayiş etdirildiyi ekran yerləşdirilmişdi. Rəqəmlər tamamilə heyrətamiz idi.

Mən nəticələri izləmək üçün başımı arxaya çevirdim. Daha sonra başımı yenidən önə aparmaq istəyəndə qəribə bir vızıltı səsi eşitdim. Mən sağ qulağıma dəyən zərbənin ağrısını hiss etdim. Öz-özümə dedim ki, bu nə idi belə? Sağ əlimi qulağıma apardım. Əlim qan içində qalmışdı. Hər yerdə qan var idi.

Dərhal hücuma məruz qaldığımı anladım. Başımızın üstündə güllələr uçmağa davam edirdi. Xüsusi xidmət agentləri bütün cəsarətlərini toplayaraq səhnəyə qaçdılar. Lakin bütün bunlara baxmayaraq, mən özümü təhlükədə hiss etmədim. Çünki Tanrının yanımda olduğunu hiss etmişdim. Əgər mən son anda başımı tərpətməsəydim, bu gün burada olmazdım”.