Bu dəfə Ukrayna məsələsi Trampı üzdü | Görüşdə nələr müzakirə edilir?

Malayziyanın paytaxtı Kuala Lumpurda Rusiyanın xarici işlər naziri Sergey Lavrov və ABŞ Dövlət katibi Marko Rubio arasında görüş baş tutub.

Tərəflər ikitərəfli münasibətlər və dünyadakı vəziyyətlə bağlı ətraflı fikir mübadiləsi aparıblar.

S.Lavrov və M.Rubio Ukrayna müharibəsinin nizamlanmasını, İran və Suriya ətrafındakı vəziyyəti müzakirə ediblər. Sergey Lavrov və Marko Rubio əlaqələrin bərpasına hazır olduqlarını təsdiqləyiblər. Bu istiqamətdə ilk addım kimi Rusiya və ABŞ arasında birbaşa hava əlaqəsinin bərpası önə çəkilib.

Marko Rubio görüşdən sonra mətbuata açıqlamasında bildirib ki, ABŞ Ukraynadakı münaqişəyə son qoymaq üçün yol xəritəsini görmək istəyir.

O, S.Lavrovla görüşünü səmimi və vacib adlandırıb. M.Rubio əlavə edib ki, ABŞ Prezidenti Donald Tramp Ukrayna məsələsində Rusiya tərəfdən çevikliyin olmamasından məyusdur.

Onun sözlərinə görə, D.Tramp Administrasiyası və Senat arasında Rusiyaya qarşı yeni sanksiyalar haqqında qanun layihəsi ilə bağlı danışıqlar gedir. Ağ Ev Rusiyaya ağır məhdudiyyətlər tətbiq etmək barədə düşünür.