Bu ikibaşlı ilan necə yaşayır? - Hamını təəccübləndirən hadisə

ABŞ-də tapılan nadir ilan artıq 7 aydır ki, normal yaşayır və belə görünür ki, ikinci başı ona mane olmur.

Bu barədə "Popular Science" nəşri yazır.

Kaliforniya ştatının Berkli şəhərində yerləşən "East Bay Vivarium" laboratoriyasının iki işçisi 7 ay əvvəl inkubatordan çıxardıqları ilan balasını görəndə çox təəccübləniblər. "Lampropeltis California" növünə aid zəhərsiz ilan balasının iki başı var.

Bu növ ilanlar ABŞ-nin qərb hissəsində yaşayır və yarımsəhra, seyrək meşə, eyni zamanda çay kənarındakı kolluqları üstün tuturlar. Bu ilanlar 1,5 metr uzunluğa qədər böyüyür və insanlar üçün heç bir təhlükə törətmirlər. Onlar kərtənkələlər, gəmiricilər və digər ilanlarla qidalanırlar.

İlan qidalanmaq üçün dominant başdan istifadə edir, ikinci baş isə demək olar ki, qida ilə maraqlanmır və hətta yeməyə belə cəhd etmir. Laboratoriya işçiləri hesab edirlər ki, ikinci baş ilanın heç bir orqanını idarə etmir və onun qida borusu iki bədənin birləşdiyi yerdə bitir.