Bu kəşf sübut edir ki... | 280 milyon il öncə yaşamış yırtıcı

İspaniyanın Mayorka adasında 270-280 milyon il əvvəl yaşamış qorqonopslar növünə aid fosil aşkar edilib.

Qorqonopslar Perm dövründə yaşayıb, məməlilərin təkamül xəttinə aid yırtıcı növüdür. Onlar “qılınc dişləri” ilə fərqlənib və ekosistemlərin super yırtıcıları olublar.

Bu növ əvvəlki tapıntılardan fərqli olaraq Rusiya və Cənubi Afrika əvəzinə Mayorkada aşkarlanıb. Fosil kiçik və orta ölçülü, uzunluğu təxminən bir metr olan heyvana aiddir. Tapılan qalıqlara kəllə, fəqərə, qabırğa və tam bud sümüyü daxildir.

Tədqiqatçılar bu fosilin qorqonopsların təkamülündə yeni məlumat təqdim etdiyini bildiriblər. Araşdırma nəticələri göstərir ki, qorqonopsların ayaqları sürünənlərdən fərqli olaraq daha şaquli yerləşib, bu da onların daha effektiv hərəkət etməsinə imkan verib.

Qeyd edək ki, Perm dövründə Mayorka ada deyil, Pangeya supermaterikinin bir hissəsi olub və ekvator enliyində yerləşib. Qalıqların tapıldığı ərazi sel düzənliyi olub. Bu kəşf qorqonopsların yayılma coğrafiyası və təkamülü ilə bağlı yeni biliklər təqdim edir.