Bu ölkə düşmənimiz deyil | Stoltenberq dünyaya mühüm mesajlar verdi

“NATO Asiya-Sakit Okean regionu ölkələri, o cümlədən Avstraliya, Yeni Zelandiya, Koreya Respublikası və Yaponiya ilə əməkdaşlığı gücləndirməyə davam edəcək”.

Bunu Alyansın səlahiyyət müddəti başa çatan Baş katibi Yens Stoltenberq Yaponiya nəşrinə müsahibəsində deyib.

Bildirib ki, söhbət silahlara nəzarət, texnologiyanın inkişafı və kiberhücumlara qarşı mübarizə kimi sahələrdə əlaqələrin inkişafından gedir.

Yens Stoltenberq müsahibəsində Alyansın Çinlə münasibətlərindən də bəhs edib. O əmin edib ki, NATO bu ölkəni düşmən hesab etmir, baxmayaraq ki, Pekin müttəfiq ölkələrin dəyərlərinə, maraqlarına və təhlükəsizliyinə meydan oxuyur.

Bundan əlavə, NATO-nun sabiq baş katibi Çini Rusiyaya hərbi dəstək verməkdə ittiham edib. O bildirib ki, bununla Pekin İkinci Dünya müharibəsindən sonra Avropada ən böyük müharibəni alovlandırır.

Sabiq baş katib həmçinin deyib ki, təşkilat hazırda nüvə doktrinasına yenidən baxmağa ehtiyac görmür. Y.Stoltenberqin sözlərinə görə, hazırda Alyans üçün ciddi təhlükə yoxdur. Buna görə də NATO nüvə strategiyasına yenidən baxmaq niyyətində deyil.

Y.Stoltenberq bildirib ki, nüvə silahlanmasının qarşısının alınması üçün istifadə edilən ABŞ-nin F-16 qırıcılarının F-35-lərlə əvəzlənməsi prosesi də davam edəcək.

O, NATO-ABŞ münasibətlərindən danışarkən qeyd edib ki, Ağ Ev Alyansın güclü müttəfiqi olaraq qalacaq.