Bu ölkə Rusiya ilə savaşa başlaya bilər? - “Münasibətlər daha da pisləşəcək”

“ABŞ Rusiya ilə Avropa arasında mümkün müharibə fonunda qitə ölkələrindəki hərbi qüvvələrini geri çəkəcək”.

Bunu Ukrayna Hərbi Hava Qüvvələrinin keçmiş kəşfiyyat zabiti, analitik İqor Lutsenko deyib.

Ekspert Avropa İttifaqı-ABŞ münasibətlərinin daha da pisləşəcəyini proqnozlaşdırıb:

“Gələcəkdə münasibətlər daha da pisləşəcək. Çünki ABŞ istənilən administrasiya dövründə öz qoşunlarını Avropadan çıxarmağa davam edəcək. Çünki bu ölkə artıq faktiki olaraq heç nəyə qadir deyil. Onun hələ müəyyən silah-sursatı var, maliyyə baxımından da bəzi imkanları qalır, amma bunlar da Avropadan çıxarılacaq, çünki onların burada möhkəmlənəcək heç nələri yoxdur.

İndi quru müharibəsi gedir, amerikalılar cəmi üç saniyəyə məhv edilə bilər. Ruslarla döyüşmək üçün imkanları yoxdur, bunu anlayırlar, məhz buna görə də buradan çəkilib gedəcəklər”, – ekspert bildirib.

İqor Lutsenko ABŞ-nin Rusiya ilə mümkün müharibədə Avropanı müdafiə etməyəcəyini iddia edib:

“Hazırkı ABŞ Administrasiyası hesab etmir ki, Avropanın məhv edilməsi qarşısını almaq üçün mütləq nəsə edilməli olan bir riskdir, yaxud bunun baş verməməsi üçün hansısa investisiyalar qoyulmalıdır. Kremlin ideoloqu Aleksandr Duqin və onun planlarını oxumaq kifayətdir: “hamını öldürəcəyik”, “Avropanı məhv edəcəyik” və s. Onlar düşünürlər ki, bundan pul qazanmaq lazımdır. Amma tezliklə onlara cavab veriləcək”.