Bu ölkədə tarix yenidən yazılır | Arxeoloqlardan heyrətə gətirən tapıntı

Peru sahillərində 5 min illik qadın məzarı tapılıb.

Alimlərin qənaətinə görə, qadın qədim Karal sivilizasiyasının ali təbəqəsinə mənsub olub.

Arxeoloqlar bildirirlər ki, Perunun paytaxtı Limadan təxminən 180 kilometr məsafədə yerləşən eyniadlı Karal şəhəri Cənubi Amerikanın ən qədim yaşayış məskəni hesab olunur.

Tarixi araşdırmalara əsasən, burada insanlar qədim Misir, Çin və Şumer sivilizasiyaları ilə eyni dövrdə yaşayıblar.

Tapıntı onu da göstərib ki, bu sivilizasiyada yalnız kişilər deyil, qadınlar da mühüm rol oynayıblar.

20-35 yaşlarında vəfat etdiyi güman edilən qadının cəsədi Amazon ara tutuquşusuna aid ola biləcək göy və qəhvəyi rəngli lələklərlə bəzədilmiş mantiyaya bükülü vəziyyətdə tapılıb.

Arxeoloqlar əlavə ediblər ki, məzarın ətrafında səbətlər, gil qablar, balqabaq və tukan quşunun dimdiyi də aşkarlanıb.