Bunlar Putinin xeyrinə işlədi | Tramp Rusiyanın irəliləməsinin 2 əsas səbəbini açıqladı

ABŞ-nin Respublikaçılar Partiyasının prezidentliyə namizədi Donald Tramp ilə Ukrayna Prezidenti Volodimir Zelenski arasında telefon danışığı olub.

O, söhbətin detallarını “Fox News”a müsahibəsində açıqlayıb.

Bildirib ki, V.Zelenski ilə müharibənin gedişatını müzakirə edib və ona savaşı bitirməli olduğunu deyib:

"Mən Prezident V.Zelenskiyə dedim ki, müharibəni bitirmək lazımdır. Baxın, Rusiya irəliləyir və hər gün 2 tərəfdən də itkilərin sayı artmağa davam edir. Buna görə də bu biabırçılığa son qoymaq lazımdır.

Rusiyalılar Hitleri və Napoleonu məğlub ediblər və onlarda irəliləmə motivasiyası var. Ukraynanın yaz hücumu isə uğursuz oldu. Bu müharibədə Rusiyanın irəliləməsində 2 əsas səbəb var. Birincisi, Cozef Baydenin neft şirkətlərinə gərgin münasibəti və körfəz ölkələri ilə əlaqələri gərginləşdirməsidir.

Bunun sayəsində neft 100 dollara yaxınlaşdı və Vladimir Putinə planlarının həyata keçirmək üçün kifayət qədər maliyyə resursu verdi. Digər səbəb isə C.Baydenin Əfqanıstanı tərk etməsi oldu. Bütün bunlar V.Putinin xeyrinə işlədi".

Məlumat üçün bildirək ki, bu, Donald Trampın müharibə ilə bağlı ilk belə açıqlaması deyil. O bundan əvvəl də dəfələrlə prezident seçiləcəyi təqdirdə Rusiya-Ukrayna müharibəsinə son qoyacağını deyib.