“Bütün addımlar atılmayana qədər qərar dəyişdirilməyəcək” | Marta Kos

Ermənistanda qeydiyyatdan keçmiş təyyarələrin Avropa İttifaqının hava məkanında uçuşlarına qoyulan qadağa siyasi deyil, texniki səbəblərə görədir.

Bunu Avropa İttifaqının Genişlənmə üzrə komissarı Marta Kos deyib.

“Bu məsələ Avropa Aviasiya Təhlükəsizliyi Agentliyinin səlahiyyətindədir və onların qiymətləndirməsinə əsasən, Ermənistanın atmalı olduğu müəyyən addımlar var. Ermənistan Mülki Aviasiya Komitəsi ilə əlaqə saxlayırıq və lazım olan bütün addımlar atılmayana qədər qərarın dəyişdirilməsi mümkün deyil. Bir daha vurğulayıram ki, bu, texniki prosesdir, ölkənin siyasi münasibətləri ilə heç bir əlaqəsi yoxdur. Biz, sadəcə, aviasiya təhlükəsizliyi baxımından hər şeyin qaydasında olmasını təmin etmək istəyirik”, – deyə o bildirib.

Qeyd edək ki, 2020-ci ilin iyunundan Avropa Komissiyası Ermənistan aviaşirkətlərinə məxsus təyyarələrin Avropa İttifaqına üzv olan ölkələrin ərazisi üzərindən bütün uçuşlarını qadağan edib. Qadağa şirkətlərin beynəlxalq təhlükəsizlik üzrə standartlara uyğun fəaliyyət göstərmədikləri üçün tətbiq olunub.