Bütün dünya məhz onu axtarır | Elə təhlükəli insandır ki...

Latın Amerikasının ən təhlükəli narkotik kartellərindən birinin rəhbərini tapmağa kömək edəcək məlumat üçün bir milyon dollar mükafat elan edilib.

“The Mirror” xəbər verir ki, ötən ilin yanvarında həbsdən qaçan “El Fito” ləqəbli Adolfo Macias Villamar məşhur Ekvador cinayətkar qruplaşması “Los Choneros”un lideridir.

O, ölkəni bürüyən zorakılıq dalğası zamanı həbsxanadan qaçıb və Ekvador hüquq-mühafizə orqanları onu tapa bilmirlər.

El Fitonun Kolumbiya və Meksika da daxil olmaqla digər ölkələrdəki kartellərlə sıx əlaqələri olduğu bilinir. “Los Choneros” 1990-cı illərdə Ekvadorda Manabi əyalətində şöhrət qazanıb və o vaxtdan bəri Kolumbiyadan Latın Amerikası və ABŞ-yə mühüm kokain tədarükçüsünə çevrilib.

Ekvador Daxili İşlər Nazirliyi onun harada olduğu barədə məlumat verən hər kəsə 1 milyon dollar mükafat təklif etdiyini bildirib.

El Fitonun axtarışları son aylarda beynəlxalq təşkilatların, o cümlədən İnterpolun 196 ölkədə onun tutulması ilə bağlı qırmızı bildiriş yaydığı yardım sayəsində intensivləşib.