Cavab tədbirlərini nəzərdən keçirməli olacağıq | Meloni

“Gəmilərin Hörmüz boğazından keçməsi üçün rüsumların tətbiqi qlobal iqtisadi vəziyyətə mənfi təsir göstərə bilər”.

Bunu İtaliyanın Baş naziri Corcia Meloni Deputatlar Palatasında hökumətin fəaliyyətinə həsr olunmuş brifinqdə bəyan edib.

Onun sözlərinə görə, gəmilərin keçməsi üçün heç bir rüsum tutulmamalıdır.

“Buna görə də İtaliya və onun Avropa və Qərbdəki tərəfdaşları üçün 28 fevraldan əvvəl mövcud olan şəraitə uyğun olaraq gəmiçilik azadlığının tam bərpası prioritet məsələdir. Məqsəd enerji bazarlarında, kritik xammal, gübrə və iqtisadiyyatımız üçün həyati əhəmiyyət daşıyan digər məhsullar üzrə mövcud gərgin vəziyyəti normallaşdırmaqdır.

Əgər əksinə, Yaxın Şərqdəki böhran yenidən daha da kəskinləşərsə, pandemiya dövründə tətbiq edilən yanaşma və alətlərə bənzər şəkildə Avropa səviyyəsində cavab tədbirlərini ciddi şəkildə nəzərdən keçirməli olacağıq. İtaliya həmçinin mümkün spekulyativ davranışların qarşısını almaq üçün bütün mümkün tədbirləri işə salmağa hazırdır. Zərurət yaranarsa, enerji şirkətlərinin mənfəəti ilə bağlı əlavə addımlar da atıla bilər”, – deyə o əlavə edib.

Meloni qeyd edib ki, 30-dan çox ölkə Hörmüz boğazında sərbəst hərəkətin təmin edilməsi üzərində işləyir.