Cəbhədə vəziyyət nəzarətdən çıxdı | Rusiya MN-dən kritik açıqlama

Rusiya ilə ABŞ liderlərinin Alyaskada gözlənilən görüşü ərəfəsində Moskva sərhəddə Ukraynanın hərbi fəallığının artmasından narahatdır.

Rusiya mənbələrinə görə, Kursk vilayəti yaxınlığında Ukrayna Silahlı Qüvvələrinin 1500 nəfərlik qrupu toplanıb. İddialara əsasən, aralarında Braziliya, Meksika və Kolumbiyadan olan muzdlu döyüşçülər də var.

Bryansk vilayətində isə sərhədə yaxın yeganə təchizat körpüsü partladılıb ki, bu da Moskva tərəfindən mümkün hücumun əlaməti kimi qiymətləndirilir.

Krım sahillərində NATO kəşfiyyat təyyarələrinin aktivliyi qeydə alınıb. Rusiya bunu Qara dənizdə mümkün əməliyyatların hazırlığı kimi görür.

Son günlər Ukrayna Ordusu Rusiya ərazisinə bir sıra ağır zərbələr endirib. Avqustun 14-də Həştərxan vilayətində “Olya” limanı vurulub, İrandan gətirilən “Shahed” PUA hissələrini və sursatını daşıyan “Port Olya 4” gəmisi məhv edilib. Volqoqrad neft emalı zavodu və Bryansk vilayətində “Drujba” kəmərinin nasos stansiyası hədəfə alınıb.

Avqsutun 15-i səhər saatlarında Samara vilayətinin Sızran şəhərindəki “Rosneft” neft emalı zavoduna güclü zərbə endirilib. Rostov vilayətində PUA hücumu nəticəsində 15 nəfər yaralanıb.

Kiyev bildirir ki, bütün hədəflər Rusiya Ordusunun təchizatı və hərbi logistika obyektləridir.

Buna cavab olaraq Rusiya 14-15 avqustda Ukraynaya raket və PUA zərbələri endirib. Ən azı 6 mülki şəxs ölüb, 15 nəfər yaralanıb, enerji infrastrukturu və yaşayış məntəqələri zərər görüb.