Cəlalabadda zəlzələ əsl faciəyə səbəb oldu | Yeni məlumatlar

Əfqanıstanın Cəlalabad şəhəri yaxınlığında 6 maqnitudada zəlzələ baş verib.

Avropa-Aralıq dənizi Seysmoloji Mərkəzinin məlumatında bildirilir ki, yeraltı təkanlar 200 min nəfər əhalisi olan Cəlalabad şəhərindən 50 km şimal-şərqdə qeydə alınıb.

ABŞ Geoloji Xidmətinin məlumatına görə, zəlzələ ocağı təxminən 8 km dərinlikdə yerləşib. Fəlakət nəticəsində 800-ə yaxın şəxsin öldüyü, 2500-dən çoxunun yaralandığı qeyd olunub.

"Biz genişmiqyaslı xilasetmə əməliyyatına başlamışıq və yüzlərlə insanı zərər çəkmiş ərazilərin sakinlərinə kömək etmək üçün səfərbər etmişik", ‒ deyə ölkənin səhiyyə nazirliyinin sözçüsü Şərafət Zaman deyib.

Onun sözlərinə görə, zəlzələ ucqar dağlıq ərazidə baş verdiyi üçün insan itkiləri və infrastruktura dəyən ziyanla bağlı dəqiq məlumat almaq vaxt aparacaq.

BMT və Ümumdünya Səhiyyə Təşkilatı Əfqanıstanda zəlzələdən zərər çəkmiş əhaliyə yardım göstərilməsi barədə məlumat verib. Təcili yardım göstərildiyi və yaralıların müalicəsinə kömək olunduğu bildirilib.