Cənubi Qafqazda toqquşan maraqlar | ABŞ Azərbaycandan keçəcək yola nəzarət üçün...

“Parlament seçkiləri yaxınlaşdıqca qonşu Gürcüstanda daxili siyasi vəziyyətə xaricdən təsirlər artır. Qərb, Avropa ölkələri və ABŞ hazırkı hakim “Gürcü Arzusu” partiyasının seçkilərdə qalib gəlməsini istəmir”.

Bunu Gürcüstanın Strateji Planlaşdırmalar Mərkəzinin rəhbəri, politoloq Levan Mamaladze Baku TV-yə verdiyi müsahibəsində deyib.

“Bu günlərdə Avropa Parlamenti qətnamə qəbul edərək Gürcüstan hakimiyyətinin üzvlərinə sanksiyalar tətbiq etdi. Qərb, Avropa ölkələri və ABŞ hazırkı hakim partiyanın seçkilərdə qalib gəlməsini istəmir. Onların məqsədi Qərbin maliyyələşdirdiyi və istədiklərini icra edəcək hökumətin qurulmasıdır. Bu da təsadüfi deyil.

Belə ki, ABŞ Çinin dəniz yoluna alternativ olaraq qurmaq istədiyi Gürcüstan və Azərbaycandan keçəcək quru yoluna nəzarəti gücləndirmək istəyir. Çünki əgər Çin Gürcüstan vasitəsilə öz ticarət yolunu inkişaf etdirə bilsə, ABŞ-nin 100 milyardlarla dollar xərcləyərək Çinin ətrafında saxladığı hərbi bazalar öz əhəmiyyətini itirəcək. Ona görə də deyə bilərəm ki, bu seçkilər həyati önəm daşıyır. Parlament seçkilərinin nəticələri həlledici rol oynayacaq”, – deyə o qeyd edib.

Politoloq Marina İzoriya isə Gürcüstanda hakimiyyətə hansı qüvvələrin gələcəyinin olduqca mühüm əhəmiyyət kəsb etdiyini diqqətə çatdırıb:

“Cənubi Qafqazda güc balansının yeni bölgüsü getməkdədir. Bu isə istər Qərbdə, istərsə də Şərqdə baş verən hadisələrlə əlaqəlidir. Gürcüstanın hansı istiqamətə gedəcəyi seçkilərin nəticələrinə bağlıdır. Ümid edirəm ki, istənilən halda ölkəmizdə stabillik pozulmayacaq”.

Məlumat üçün bildirək ki, cari ilin oktyabrın 26-da keçiriləcək parlament seçkiləri ilə əlaqədar ölkə üzrə ümumilikdə 3031 seçki məntəqəsi yaradılıb. Səsvermə prosesi 2263 seçki məntəqəsində elektron, 768-də isə ənənəvi qaydada baş tutacaq.