Çin və Rusiya Hörmüz boğazına dair qətnaməyə veto qoyub

Bəhreynin xarici işlər naziri Əbdüllətif bin Rəşid əl-Zəyani bildirib ki, BMT Təhlükəsizlik Şurası öz öhdəliklərini yerinə yetirə bilməyib.

O bunu Bəhreyn, BƏƏ, Səudiyyə Ərəbistanı, Qətər, Küveyt və İordaniya adından birgə bəyanatı oxuyarkən diqqətə çatdırıb.

"Şura qətiyyətli və təxirəsalınmaz tədbirlər tələb edən qanunsuz hərəkətlərə münasibətdə öz öhdəliklərini yerinə yetirə bilmədi. Biz ümid edirdik ki, qətnamə layihəsi beynəlxalq hüquqa əsasən heç bir ölkənin bağlamaq hüququ olmadığı beynəlxalq dəniz yolu kimi Hörmüz boğazında gəmiçiliyin azadlığını təmin edəcək uzunmüddətli həllə doğru bir addım olacaq", – deyə Zəyani bildirib.

Qeyd edək ki, BMT-nin Hörmüz boğazı ilə bağlı qətnaməsinin qəbul edilməsinə Təhlükəsizlik Şurasının 11 üzvü razılıq verib. Rusiya və Çin qərarın əleyhinə səs verib, Pakistan və Kolumbiya isə bitərəf qalıb. Bununla da qətnamə qəbul edilməyib.

Qətnamə BMT-yə üzv dövlətlərə kommersiya gəmiçiliyinin qorunması və Hörmüz boğazında və onun ətrafında tankerlərin hərəkətinin bərpası üçün bütün zəruri vasitələri tətbiq etmək səlahiyyəti verməyi nəzərdə tuturdu.