Çində yanacaq sərfiyyatını məhdudlaşdıran yeni standartlar qüvvəyə mindi

2026-cı il 1 yanvar tarixindən etibarən Çində minik və yüngül kommersiya avtomobilləri üçün yanacaq sərfiyyatını məhdudlaşdıran yenilənmiş milli standartlar qüvvəyə minib.

Bu barədə "Xinhuanet" bildirir.

Məlumata görə, yeni qaydalar 2026-2030-cu illər dövrü üçün avtomobillər üzrə enerjiyə qənaət göstəricilərini daha da sərtləşdirir.

Yeni standartlara əsasən, ənənəvi və hibrid minik avtomobilləri üçün yanacaq sərfiyyatı normaları əvvəlki tələblərlə müqayisədə təxminən 18% azaldılıb. Ən geniş yayılmış seqmentdə, avtomatik transmissiyalı, çəkisi təxminən 1,5 ton olan avtomobillər üçün yeni limit 100 km-ə 7,74 litr təşkil edəcək.

Yüngül kommersiya avtomobilləri üzrə isə yanacaq sərfiyyatı limitləri ümumilikdə 10% azaldılıb. Çəkisi təxminən 2 ton olan benzinlə işləyən yük avtomobilləri üçün yeni norma 100 km-ə 9,13 litr səviyyəsində müəyyən edilib.

Gözlənilir ki, bu tədbirlərin həyata keçirilməsi Çin avtomobil sənayesində texnoloji yenilənməyə güclü təkan verəcək.

Yeni tələblər təkcə aşağıkarbonlu iqtisadiyyata keçidi sürətləndirməyəcək, həm də yanacaq və elektrik enerjisi xərclərinin azalması hesabına avtomobillərin istismarını istehlakçılar üçün daha sərfəli edəcək.